Pehli baar line kya hota hai ye school mein padhne se pehle main line ye word kai baar use kar chuka tha
Maths mein 3rd standard ke syllabus mein pehli baar sikhaya gaya ki jisko main line samajhta tha wo actually line nahin hai segment hai
Line toh infinite hoti hai
Jaise line infinite hoti hai waise hi uska use bhi almost infinite tareeko se hota hai
Aap qatar mein hai
Get in the Queue
Ye sabhya words normal zindagi mein use nahin hote
*Line pe aaja warna bohot maar khayega
Main abhi isko line pe laata hoon
Ek thappad khayega line pe aa jayega*
Ye saare aur kai aur dialogue humne bachpan mein maa baap se, teachers se, apne se senior bully karne wale school ke gundo se suney hain.
In sab ka matlab sirf ye hota hai " Ki beta jo tu kar raha hai galat kar raha hai, sahi ho ja, seedha ho ja warna maar khayega"
Ab kaun decide kar raha hai ki sahi kya hai aur galat kya hai ?
Jo mera sahi wo uska galat
Toh hum jo kar rahe the zaroori nahin hai ki wo galat hi tha
Hum bus jo bhi kar rahe the, usmein in dialogue maarne waalon ki manzoori nahin thi
Toh jab kisi ki koi harqat na-manzoor ho toh Line badi kaam ki cheez hai matlab
Line ka istemaal karke kai logon ne kai logon se apne hisaab se aur apne matlab ke kaam karvaye hain
Kuch nahin ho raha hai, solution nahin hai ? Line mein laga do
*Ye mere pe line maar raha hai
Dekh wo mujhe line de rahi hai*
Ye do aur aise kai dialogue humne high school ya college mein suney the ya bole hain
In sab ka matlab Pyar, Ishq aur Mohobbat se bilkul bhi nahin tha
Ye toh bus pehli pehli baarish ki mehek mein hone wale infatuations aur chhichorepann ki nishaani thi. Jab school ke lag bhag 70% ladkon ka dhyan class ki chuninda 5 ladkiyon pe hota tha aur bus apne hi khayalon mein pulav paka ke khush hua karte the, tab line maarne ya line dene ka use hua karta tha.
Aisa hota toh nahin tha par agar kisi ki kisi pe sachch mein Pick - Up Line chal gayi
toh kya kehne. ( Pick Up line - ye term maine Bombay aane ke baad hi suna isiliye school ki kahaniyon mein implement kar diya)
*Chal ek line kheech*
Ye wala kaafi recently suna.
Sniff, pull, drag.. ye saare terms mujhe pata hi nahin tha. Aur mere jaise jo bhi ye padh rahe hain unhe ek baat bata doon. Ye Line kheechna drawing book ya graph book pe line banana nahin hai. Ye wali line narcotic drugs ki line hai. Jiske consumption ko kheechna bolte hain. Haan wohi jo namak jaisi white cheez filmon mein chote chote packets mein dikhti hai. Same. Toh ye wali Line tumhein zindagi ki kadvi sachchaiyon se kai duur le jaati hai. Ab gazab ki baat toh ye hai. Ye kaam tedha hai lekin line ek dum hi seedhi kheechni padti hai.
Jab hum tedhe the toh koi thappad maarke seedhi line pe laa raha tha
Aur jab hum seedhe hain toh seedhi line kheech ke tedha kaam ho raha hai
Line kaafi achi hai waise ...haha
Anyway
Line ke topic se kaafi digress ho gaye
Kahan the hum
Line infinite hoti hai
Uska end point nahin dikhta
Dikh bhi kahan raha hai
Infinite hi lag rahi hai pichle March se, isiliye Line mein lagna bolte hai aur Segment mein lag jao aisa nahin kehte, kyunki Segment nahin, Line infinite hoti hai. Uska koi end point nahin hota
Pichley saal
Ghar jaane ke ticketon ki line mein lagey
Kai ghanton nahin kai dino ke liye
Dekhi humnein mahino tak wo lambi line'ein TV pe
Kai Railway station ke bahar train ke intezaar mein
Kai Highway par, paidal chalti hui, apne ghar ki ore
Kaam bandh
Dhandha bandh
Toh Raashan ki line
Meter chalu
Reading recording bandh
Bill amount ke peechey Zeroes ki random Line
Bill Unfair
Average Galat
Complaint likhaane ki line
Case ladhne ki line
Hafte mein ek baar
Grocery shop ki line
Sabzi mandi ki line
Takreeban ek saal tak ye saari line'ein dekhi
Laga abhi toh line'on mein lagna nahin padega chalo
Sab ko sab pata hai ki kya hoga kaisa hoga
Toh jab Hospital jaane ki naubat aayi
is baar darr thoda kam laga
kyunki ek saal ho gaya tha
Phone uthaya
Number ghumaya
Ki bhai Ambulance chahiye
Please wait
Aap kataar mein hai
Ambulance mili, par pohochi nahin
kyunki raaston pe Lambi Line'ein thi
Finally aayi
Hospital pohoche
Sifarish'on ki parchiy'on ki Line'ein laga di
Aagey badho
Hawa aane do
Kal aana
Jagah nahin hai
Bed nahin hai
Oxygen nahin hai
Ventillator nahin hai
Dawai nahin hai
Slot nahin hai
Vaccine nahin hai
Shamshaan mein jagah nahin hai
Toh phir hai kya?
Bus Line hai
Ab ye Zindagi ki intezaar wali line hai
Ya Maut ki Machine pe dikhne wali Seedhi Line
Ye toh ab apni apni kismet hai
Pehli baar na koi Line ghat rahi hai na koi Line kaam aa rahi hai
---------
Comment 1 : Kuch paane ke liye kuch khona padta hai
Comment 2 : Bharat ki haalat baaki deshon se kaafi behtar hai
Comment 3 : Modiji ne aakhir kaar jo bola tha wo karke dikhaya. Cases kam hue hain
Comment 4 : India is now Unlocked #modijirocks
Comment 5 : Nadiyon mein bhi laashon ki line lagi hui hai
Comment 6 : Ganga Maiya ki sharan mein hai. Unka aashirwad hai. RIP #modijikabharat
Comment 7 : This is a sad day for the biggest democracy. Itna population hoga toh Biggest Vaccination Drive hoga na. Ismein itni shaan ki kya baat hai?
Comment 8 : Nadi mein kaat ke baha denge chup Bsdk...
